खुलताबाद तहसीलदार गुट्टे यांनी उप जिल्हा निवडणूक अधिकाऱ्यांकडे पाठवला प्रस्ताव....
मुनीर अब्बास शाह छ.संभाजीनगर प्रतिनधी...
विशेष संक्षिप्त मतदार यादी पुनरीक्षण (SIR) मोहिमेची मुदत एक महिना वाढवून देण्याच्या मागणीसाठी सामाजिक कार्यकर्ते इक्बाल पटेल यांनी दिलेल्या निवेदनावर प्रशासकीय पातळीवर हालचाली सुरू झाल्या आहेत. खुलताबादचे तहसीलदार तथा तालुका कार्यकारी दंडाधिकारी संतोष गुट्टे यांनी यासंदर्भात मिळालेले निवेदन पुढील आवश्यक कारवाई आणि विचारार्थ उप जिल्हा निवडणूक अधिकारी, छत्रपती संभाजीनगर यांच्याकडे पाठवले आहे. आता या प्रस्तावावर निवडणूक प्रशासन काय निर्णय घेणार, याकडे सर्वांचे लक्ष लागले आहे.
भारत निवडणूक आयोगाच्या निर्देशानुसार राज्यभरात ३० जून ते २९ जुलै २०२६ या कालावधीत विशेष संक्षिप्त मतदार यादी पुनरीक्षण (SIR) मोहीम राबवली जात आहे. या मोहिमेत मतदारांची माहिती अद्ययावत करणे, आवश्यक कागदपत्रांची पडताळणी करणे आणि पात्र नागरिकांची नावे मतदार यादीत समाविष्ट करण्याची प्रक्रिया सुरू आहे. याच पार्श्वभूमीवर खुलताबादचे सामाजिक कार्यकर्ते इक्बाल पटेल यांनी ६ जुलै २०२६ रोजी निवेदन सादर करून, सध्याची परिस्थिती पाहता मोहिमेची मुदत वाढवणे गरजेचे असल्याचे म्हटले आहे, जेणेकरून कोणताही पात्र नागरिक मतदानाच्या हक्कापासून वंचित राहणार नाही.
...म्हणून मुदतवाढीची मागणी
निवेदनात नमूद करण्यात आले आहे की, सध्या राज्याच्या बहुतांश भागात मान्सून सक्रिय असून ग्रामीण भागात खरीप हंगामातील शेतीची कामे जोरात सुरू आहेत. याशिवाय रोजगाराच्या निमित्ताने नागरिकांची मोठी संख्या गावाबाहेर असून अनेक नागरिकांकडे आवश्यक कागदपत्रे वेळेत उपलब्ध होत नाहीत. अशा परिस्थितीमुळे अनेक पात्र मतदार दिलेल्या मुदतीत मतदार यादी पुनरीक्षणाची प्रक्रिया पूर्ण करू शकत नाहीत. जर ही मोहीम सध्याच्या मुदतीतच संपली, तर हजारो पात्र नागरिक मतदार यादीतून वंचित राहण्याची भीती आहे, ज्याचा त्यांच्या घटनात्मक मतदानाच्या अधिकारावर विपरीत परिणाम होऊ शकतो.
बीएलओ (BLO) संख्या दुप्पट करण्याची मागणी
हीच बाब लक्षात घेऊन इक्बाल पटेल यांनी 'एसआयआर' (SIR) मोहिमेची मुदत २९ ऑगस्ट २०२६ पर्यंत वाढवण्याची मागणी केली आहे. यासोबतच ही मोहीम अधिक प्रभावी करण्यासाठी बूथ लेव्हल ऑफिसर (BLO) यांची संख्या दुप्पट करावी, प्रत्येक पात्र मतदारापर्यंत पोहोच सुनिश्चित करावी आणि कागदपत्र पडताळणी व नोंदणी प्रक्रिया वेळेत पूर्ण करावी, अशीही मागणी त्यांनी केली आहे. पुरेशा संख्येने बीएलओ उपलब्ध झाल्यास मोहिमेचा वेग आणि दर्जा दोन्ही सुधारेल व जास्तीत जास्त नागरिकांना याचा लाभ होईल, असे त्यांचे म्हणणे आहे.
लोकप्रतिनिधींचा सहभाग आवश्यक
निवेदनात पुढे म्हटले आहे की, केवळ प्रशासकीय यंत्रणाच नव्हे, तर प्रत्येक प्रभागातील लोकप्रतिनिधी आणि नगरसेवकांचाही या मोहिमेत सक्रिय सहभाग आवश्यक आहे. नगरसेवकांनी आपापल्या भागात व्यापक जनजागृती करावी, नागरिकांना आवश्यक मार्गदर्शन व मदत करावी आणि माहितीच्या अभावामुळे किंवा कागदपत्रांच्या समस्येमुळे कोणताही पात्र मतदार यादीतून सुटणार नाही याची खात्री करावी.
या संदर्भात तहसीलदार संतोष गुट्टे यांनी मिळालेले निवेदन पुढील कारवाईसाठी उप जिल्हा निवडणूक अधिकारी, छत्रपती संभाजीनगर यांच्याकडे पाठवले आहे. आता या मागणीवर निवडणूक प्रशासन काय भूमिका घेते आणि मोहिमेची मुदत वाढवण्याबाबत काही सकारात्मक निर्णय होतो की नाही, हे पाहणे महत्त्वाचे ठरेल
